12‏/06‏/2012

My tools to my Curls

السلام عليكم
البوست اليوم حيكون عن الأغراض و المنتجات اللي أستخدمها لما اسوي شعري ويفي


طبعا أنا اقصد كيف لما اسوي شعري بـ شكل طبيعي
أو بشكل عادي .. اللي هي الويفز الطبيعيه
لما يكون عندي جمعة بنات أو مناسبه بسيطه

أحلى شكل لما تكون طبيعيه ..
كثير كثير كثير يسألوني عن كيف أسوي شعري ويفي
طبيعة شعري الأساسيه ويفي .. فـ أنا بحاول أقرب الصوره الطبيعيه بس بشكل مرتب

ممكن إن شاء الله في فيديوهات قادمه أوريكم التكنيك بالزبط و كيف أسويه
لكن الآن راح أعرض الأدوات و المستحضرات اللي أستخدمها ..

طبعا أنا أسويها بـ طريقتين .. يا إني ابدأ بشعري و هو طبيعي
يعني بدون ما اخليه ستريت قبل .. و هذا راح يعطيكي لوك طبيعي أكثر لـ شعرك

أو إني افردو اول بالستريتنير بعدين استخدم الفير




أنا استخدم الفير حق جوسي إيبير
لو كنتي تدوري على فير حلو أو لو كنتي محتاره على جوسي إيبير
لا تترددي تشتريه
سار موضوع اني اسوي شعري شي سهل و ما ياخذ وقت
و اللي مره يجنن ان الكيرلز تثبت معاكي يومين بدون اي سبراي في الحياه ..



في منو 3 مقاسات .. أنا عندي الوسط اللي هو 19
و إن شاء الله قريب راح أشتري المقاس 25
بس الحلو في 19 انو تقدري تسوي منو كيرلي و تقدري تسوي ويفي ..
يعني لو كنتي ما تبي تشتري الا واحد .. انصحك بمقاس 19 لانك حتستفيدي منو أكثر
يجي معاه قلفز .. من اول ما تشبكيه يحتر و على طول تستخدميه ..
تلفي الشعره عليه 10 ثواني يكفي انها تلفلك الشعره و تثبت ليومين او اكثر
انا عندي من سنه تقريبا .. و ما شاء الله ما خرب و الحراره زي ما هي =)
أشتريتو من الموزع الرسمي لـ جوسي إيبير في السعوديه
لو حابين سوو سيرتش و يطلعلكم موقعهم ..
همم ناسيه بكم اشتريتو بس تقريبا 200 و شي ..

الخطوه اللي بعد .. حسب أحيانا اسويها قبل و أحيانا بعد
اللي هي اني اعطي حجم للشعر ..
ما أسويها كثير ..


أتكلمت قبل عن الشي الجميل هذا
من سبراي مكثف من ويلا .. راااااائع
في منو بخاخ و في منو موس .. لكن البخاخ افضل من الموس بـ نظري
و من بعد ما اتكلمت عنو كثير بنات جربوه و قالولي عن جد نفع معاهم ..
يعطي شعرك كثافه حلوه .. يعني لو كان شعرك قليل صدقيني حتحبيه ..
الحمدلله شعري كثير .. فـ بس أبخ كم بخه بسييييطه على أطراف الشعر و يعطي شكل مكثف حلو
لكن بطلت أسوي كذا .. سرت استخدمو للـ teasing
اللي هو اني اسوي حجم عند تاج الراس ..
يعني راسك من فوق أحيانا يكون مسطح و يطلع شكلك غريب
أنا بس أبخ من البخاخ على تاج الراس و يعطي حجم حلوووو
و لو كنت مطوله برا البيت و أحتاج ان الحجم يكون ثابت
استخدم الفرشه اللي في الصوره .. أسوي تيزنق بسيط لـ شعري و ابخ البخاخ
و حيكون كل شي كويس =)

الخطوه الأخيره برضو جدا نادرا اسويها اللي هي أبخ سبراي
بما انو ما شاء الله الفير ما يحتاج معاه سبراي و من جد يثبت بالأيام بدون ما تبخي أي بخة مثبت
بس أحيانا لما اسوي ويفز مره كبيره .. شعري ناعم فـ ممكن يفك
فـ ابخ من السبراي هذا بخات بسيطه
أحلى بخاخ سبراي جربتو .. مره خفيف فـ ما تحسي ان شعرك سار يابس
او يزيت .. حلو انو يخلي شعرك طبيعي بدون ما يعطي لوك ميبس للشعر
تعرفو اللوك حق لما تحطي سبراي مو كويس على شعرك يقوم يخليه مره واقف و قاسي
في منو درجات .. بخاخ مثبت قوي و عادي
من لوريال طبعا =)



تقريبا هذي هي الأدوات و المستحضرات اللي أستخدمها ..
إن شاء الله يكون البوست فادكم اليوم ^^

على فكره أنا متوقفه حاليا عن الفيديوز لان ما عندي برنامج إيديت
و إن شاء الله راح أشتري واحد قريب و أرجع انزلكم فيديوز =)


Be Close
xoxo




:

هناك 4 تعليقات:

  1. غير معرف12/6/12

    مرة عجبني الفير
    بس بليز من فين اقدر اشترية !
    سويت سيرش وكل واحد يقول اتصلوا واطلبوا
    وانا م اضمن =\
    رجاءا قولي لي كيف حصلتية

    ردحذف
    الردود
    1. http://www.vb.eqla3.com/showthread.php?t=981173

      شوفي الرابط اللي اعطيتك هو أنا طلبتو منهم .. هم الموزعين الرسمين لـ جوسي ايبير

      مره شي رائع .. شفت دعايات و ناس كثير يتكلمو عنو
      بس من جد بعد ما استخدمتو عرفت ليش قد كذا الناس عليه
      حلو مره و يثبت شعرك بدون سبراي لـ أيام =)

      حذف
  2. غير معرف13/6/12

    ماشاءالله عليكي
    طب ممكن تعملي بوست او فيديو عن عنايتك بشعرك و منتجاتك المفضلة :)

    ردحذف
    الردود
    1. طبعا ممكن من عيوني =)
      إن شاء الله في الفيديوهات القادمه ^^

      حذف

Leave a Comment Please =)